ബിജെപി സംസ്ഥാന അധ്യക്ഷന്‍ കെ സുരേന്ദ്രന്‍ ഡല്‍ഹിയില്‍ പോയത് ചുമ്മാതൊന്നുമല്ല. പണി പിന്നാലെ വന്നു മോനേ.. വനംകൊള്ള കേസില്‍ ഇടപെട്ടിരിക്കുകയാണ് കേന്ദ്രം. വയനാട് മുട്ടില്‍ മരംമുറി കേസില്‍ ഉദ്യോഗസ്ഥരോട് റിപ്പോര്‍ട്ട് തേടി കേന്ദ്ര വനം പരിസ്ഥിതി മന്ത്രി പ്രകാശ് ജാവദേക്കര്‍. കേന്ദ്ര സഹമന്ത്രി വി മുരളീധരന്‍ കത്ത് നല്‍കിയതിന്റെ അടിസ്ഥാനത്തിലാണ് നടപടി. ഇതോടെ വെള്ളം കുടിക്കാന്‍ പോകുന്നത് പിണറായിയുടെ വിശ്വസ്തരായ ഉദ്യാഗസ്ഥരും മന്ത്രിമാരുമാണ്. റിപ്പോര്‍ട്ട് ലഭിച്ച ശേഷം തുടര്‍ നടപടി ഉണ്ടാകുമെന്ന് പ്രകാശ് ജാവദേക്കര്‍ അറിയിച്ചതായി കേന്ദ്ര സഹമന്ത്രി വി. മുരളീധരന്‍ അറിയിച്ചു.
മുട്ടില്‍ മരംമുറി കേസില്‍ രാഷ്ട്രീയ-ഉദ്യോഗസ്ഥ ഗൂഢാലോചന നടന്നിട്ടുണ്ട് എന്നാണ് കേന്ദ്ര വനം പരിസ്ഥിതി മന്ത്രി പ്രകാശ് ജാവദേക്കറിന് നല്‍കിയ കത്തില്‍ വി. മുരളീധരന്‍ ചൂണ്ടിക്കാട്ടുന്നത്. വനം-പരിസ്ഥിതി മന്ത്രാലയത്തിന്റെ മേല്‍നോട്ടത്തില്‍ സ്വതന്ത്ര അന്വേഷണം ആവശ്യപ്പെട്ടുകൊണ്ടാണ് കത്ത് നല്‍കിയിരിക്കുന്നത്. മാഫിയകളെ സംരക്ഷിക്കുകയും അവര്‍ക്ക് വേണ്ടി നിലകൊള്ളുകയും ചെയ്യുന്ന സര്‍ക്കാറാണ് കേരളത്തിലേതെന്നും മുരളീധരന്‍ പറയുന്നു.
കോടികളുടെ അനധികൃത മരംമുറിക്ക് പിന്നില്‍ ഉന്നതല ഗൂഢാലോചനയുണ്ടെന്നും പ്രതികളെ സംരക്ഷിക്കാന്‍ സര്‍ക്കാര്‍ തലത്തില്‍ നീക്കം നടക്കുന്നതായി സംശയിക്കുന്നുവെന്നും മുരളീധരന്റെ കത്തില്‍ ചൂണ്ടിക്കാണിക്കുന്നു. കേന്ദ്ര വനം പരിസ്ഥിതി മന്ത്രാലയത്തിന്റെ കീഴില്‍ നടക്കുന്ന അന്വേഷണമാകുമ്പോള്‍ വസ്തുതകള്‍ പുറത്തുകൊണ്ടുവരാനാകുമെന്നാണ് വ്യക്തമാക്കുന്നത്.
ഇതോടെ സംസ്ഥാനത്തെ ഇത്തരം മരംമുറി സംഭവങ്ങള്‍ എല്ലാം ഇതിന്റെ ഭാഗമായി കേന്ദ്രം അന്വേഷിക്കും. അതേസമയം മുട്ടില്‍ മരംമുറി സംഭവം, കൊടകര കേസില്‍ പ്രതിരോധത്തിലായ ബിജെപിയുടെ പ്രത്യാക്രമണമല്ലെന്നും വി. മുരളീധരന്‍ വ്യക്തമാക്കി. മാഫിയകളെ സഹായിക്കാന്‍ ഉത്തരവിറക്കുന്ന ആദ്യ സര്‍ക്കാരാണ് പിണറായി വിജയന്റേതെന്നും മുരളീധരന്‍ വിമര്‍ശിക്കുന്നു. കോടിക്കണക്കിന് മരം മുറിച്ച് കടത്തിയതിന്റെ ചെറിയ ഭാഗങ്ങള്‍ മാത്രമാണ് ഇപ്പോള്‍ പുറത്തുവന്നിരിക്കുന്നത്. തെറ്റ് ചെയ്യുന്ന ഉദ്യോഗസ്ഥര്‍ക്കെതിരെ നടപടിയെടുക്കേണ്ട സര്‍ക്കാര്‍ നിയമലഘനം കണ്ടെത്തിയ ഉദ്യോഗസ്ഥര്‍ക്കെതിരെ നടപടിയെടുക്കുന്നുവെന്നും മുരളീധരന്‍ മാധ്യമങ്ങളോട് പറയുകയുണ്ടായി.
താന്‍ മന്ത്രിയായിരുന്ന സമയത്തല്ല മരം മുറി നടന്നതെന്നാണ് കഴിഞ്ഞ ദിവസം ഒരു മന്ത്രി നിയമസഭയില്‍ പറഞ്ഞത്. ആദ്യ പിണറായി സര്‍ക്കാരിലെ വനം മന്ത്രിയുടെയും റവന്യൂമന്ത്രിയുടെയും അറിവോടെയല്ലാതെ ഇത്രയും വലിയ കൊള്ള നടക്കില്ല. ഇതിന് രാഷ്ട്രീയ നേതൃത്വത്തിന്റെയും ഉദ്യോഗസ്ഥ വിഭാഗങ്ങളുടെയും പിന്തുണയുണ്ടെന്നും അദ്ദേഹം പറഞ്ഞു. കേന്ദ്രം ഇടപ്പെട്ടതോടെ തട്ടിപ്പിന് ഉത്തരവാദിയായ മുഴുവന്‍ ആളുകള്‍ക്കെതിരെയും നടപടിയുണ്ടാകുമെന്നാണ് വിലയിരുത്തല്‍.
