യുവാവിന്റെ മൃതദേഹം അരക്ക് താഴെ പൂർണമായും തെരുവ് നായ്ക്കൾ കടിച്ചു കീറി ഭക്ഷിച്ചു, എല്ലുകൾ ബാക്കി വെച്ചു

കൊല്ലം . യുവാവിന്റെ മൃതദേഹം അരക്ക് താഴെ പൂർണമായും തെരുവ് നായ്ക്കൾ കടിച്ചു കീറി ഭക്ഷിച്ച നിലയിൽ കണ്ടെത്തി. കൊല്ലം പാരിപ്പള്ളി ചാവര്‍കോടാണ് ഇരുപത് ദിവസത്തോളം പഴക്കമുള്ള മൃതദേഹം ആണ് തെരുവു നായ്ക്കള്‍ കടിച്ചുകീറിയ നിലയില്‍ കണ്ടെത്തിയിരിക്കുന്നത്. ചാവര്‍കോട് ഗാംഗാലയം വീട്ടില്‍ അജിത് ദേവദാസിന്റേതാണ് മൃതദേഹമെന്ന് പോലീസ് സ്ഥിരീകരിച്ചു. അരയ്ക്ക് താഴോട്ടുളള ഭാഗം പൂര്‍ണമായി നായ്ക്കള്‍ ഭക്ഷിച്ച നിലയിലായിരുന്നു.

ആളൊഴിഞ്ഞ പറമ്പിൽ പറങ്കിമാവിന്റെ ചുവട്ടിലായാണ് മൃതദേഹം ഉണ്ടായിരുന്നത്. അരക്ക് താഴെ നായ്ക്കൾ ഭക്ഷിച്ച ശേഷം എല്ലുകൾ മാത്രമാണ് അവശേഷിക്കുന്നത്. പ്രദേശത്ത് ദുര്‍ഗന്ധം വമിച്ചതോടെ കഴിഞ്ഞദിവസം രാത്രി നാട്ടുകാര്‍ വിവരം പൊലിസിനെ അറിയിക്കുകയായിരുന്നു. തുടര്‍ന്ന് നടത്തിയ തെരച്ചിലിലാണ് മൃതദേഹം കണ്ടെത്തുന്നത്.

അജിത്തും ഭാര്യയും തമ്മില്‍ കുടുംബപ്രശ്‌നങ്ങള്‍ ഉണ്ടായിരുന്നതായി നാട്ടുകാർ പറയുന്നുണ്ട്. അജിത്തിനെതിരെ ഭാര്യ പാരിപ്പള്ളി പൊലീസ് സ്റ്റേഷനില്‍ ഒരു പരാതിയും നല്‍കിയിരുന്നു. അജിത് തനിച്ചായിരുന്നു താമസം. ഫോറന്‍സിക് സംഘം സ്ഥലത്തെത്തി നടപടികള്‍ പൂര്‍ത്തിയാക്കി. തുടര്‍നടപടികള്‍ക്കായി മൃതദേഹം പാരിപ്പള്ളി മെഡിക്കല്‍ കോളജ് ആശുപത്രിയിലേയ്ക്ക് മാറ്റിയിരിക്കുകയാണ്.