9.021 ഗ്രാം എം.ഡി.എം.എയുമായി യുവതി കാസർഗോഡ് അറസ്റ്റിലായി. മൊഗ്രാൽ പുത്തൂർ പഞ്ചായത്ത് കുന്നിലെ ക്വാർട്ടേഴ്സിൽ താമസിക്കുന്ന നിസാമുദ്ദീന്റെ ഭാര്യ എസ്.റംസൂണ(30)യെയാണ് എക്സൈസ് കാസർകോട് റെയ്ഞ്ച് അസിസ്റ്റന്റ് എക്സൈസ് ഇൻസ്പെക്ടർ ജെ.ജോസഫും സംഘവും അറസ്റ്റു ചെയ്തിട്ടുള്ളത്.
റംസൂണയ്ക്കു മയക്കുമരുന്നു ഇടപാട് സംഘവുമായി ബന്ധമുണ്ടെന്ന് എക്സൈസിനു നേരത്തെ സൂചന കിട്ടിയിരുന്നു. തുടർന്ന് എക്സൈസ് സംഘം ദിവസങ്ങളായി ഇവരെ നിരീക്ഷിച്ചു വരുകയായിരുന്നു. വ്യാഴാഴ്ച വൈകുന്നേരമാണ് യുവതി എക്സൈസിന്റെ പിടിയിലാവുന്നത്.
റിമാന്റിലായ റംസൂണയെ ഹോസ്ദുർഗ്ഗ് വനിതാ ജയിലിലേയ്ക്ക് മാറ്റിയിരിക്കുകയാണ്. മയക്കുമരുന്ന് വ്യാപാരം അധികൃതരുടെ ശ്രദ്ധയിൽപ്പെടാതിരിക്കാൻ യുവതികളെ ഉപയോഗിച്ചുവരുന്ന സംഘമാണ് ഇടപാടുകൾക്ക് പിന്നിലെന്നു എക്സൈസ് പറയുന്നു.
