കോഴിക്കോട് . സംസ്ഥാന സർക്കാരിന്റെ പ്രചാരണ പരിപാടി നവകേരള സദസ്സിലും അതിനായുള്ള സംഘാടക സമിതി യോഗത്തിലും പങ്കെടുക്കാത്തവരെ തൊഴിലുറപ്പു മസ്റ്റർ റോളിൽ നിന്ന് പുകച്ച് പുറത്ത് ചാടിക്കുമെന്ന് പഞ്ചായത്ത് വൈസ് പ്രസിഡന്റിന്റെ ഭീക്ഷണി. കുടുംബശ്രീ ഗ്രൂപ്പിൽ പഞ്ചായത്ത് വൈസ് പ്രസിഡന്റിന്റെതായി വന്ന ശബ്ദ സന്ദേശം ഇതിനകം വിവാദമായി.
ഉള്ളിയേരി പഞ്ചായത്ത് നാലാം വാർഡ് കുടുംബശ്രീ എഡിഎസ് വാട്സാപ് ഗ്രൂപ്പിൽ വാർഡ് മെംബർ കൂടിയായ വൈസ് പ്രസിഡന്റ് എൻ.എം.ബാലരാമൻ ഇട്ട ശബ്ദസന്ദേശം ആണ് വിവാദമായിരിക്കുന്നത്. ‘കേരളത്തെ സംരക്ഷിക്കാനുള്ളതാണു നവകേരള സദസ്സ്, എഡിഎസ് ജനറൽ ബോഡി അംഗങ്ങൾ സദസ്സിന്റെ ആലോചനായോഗത്തിൽ നിർബന്ധമായും പങ്കെടുക്കണം.
നവകേരള സദസ്സിലെയും പരിപാടിയുടെ പ്രചാരണത്തിലെയും ഹാജർ നോക്കിയാണു തൊഴിലുറപ്പു പദ്ധതിയുടെ മസ്റ്റർ റോൾ അടിക്കുക’ വാട്സാപ് സന്ദേശത്തിൽ മുന്നറിയിപ്പ് നൽകിയിരിക്കുന്നു. എന്നാൽ, പരിപാടിയുടെ പ്രാധാന്യം എല്ലാവരെയും അറിയിക്കാനാണു ശബ്ദസന്ദേശം നൽകിയതെന്നും, അത് ഭീഷണിയല്ലെന്നും തുടർന്ന് പറഞ്ഞ പഞ്ചായത്ത് വൈസ് പ്രസിഡന്റ്, പങ്കെടുക്കാത്തവർക്കെ തിരെ നടപടിയെടുക്കാൻ സർക്കാർ നിർദേശമില്ലെന്നും പറഞ്ഞിട്ടുണ്ട്.
