കൊവിഡ് രോഗികള്‍ക്ക് പ്രാണവായു നല്‍കാന്‍ സാനിയ മിര്‍സ, 25ലക്ഷം സമാഹരിക്കും

രാജ്യത്ത് ഓക്‌സിജന്‍ പ്രതിസന്ധിക്ക് പരിഹാരമാകാന്‍ ടെന്നീസ് താരം സാനിയ മിര്‍സയും ഇറങ്ങിത്തിരിക്കുന്നു. അടിയന്തരമായി 25 ലക്ഷം രൂപ സമാഹരിക്കാനാണ് നീക്കം. കെറ്റോ എന്ന ക്രൗണ്ട് ഫണ്ടിങ് സംരഭവുമായി ചേര്‍ന്ന് പ്രവര്‍ത്തിച്ച് പണം സ്വരൂപിക്കുകയാണ് താരം ചെയ്യുക.

ഓക്‌സിജന്‍ പ്രതിസന്ധി പരിഗണിക്കുകയാണ് പ്രഥമ ലക്ഷ്യമെന്നും ഇതിനായാണ് അടിയന്തരമായി 25 ലക്ഷം രൂപ സമാഹരിക്കുന്നതെന്നും സാനിയ വ്യക്തമാക്കി. ഇതില്‍ നിന്നും കൂടുതലായി ലഭിക്കുന്ന തുക രാജ്യത്തെ പാവപ്പെട്ടവര്‍ക്കുള്ള കോവിഡ് ചികിത്സയ്ക്കായി ഉപയോഗപ്പെടുത്തുമെന്നും പറഞ്ഞു.

ഇതുവരെ 6.14 ലക്ഷം രൂപ സമാഹരിക്കാനായെന്നു സാനിയ വ്യക്തമാക്കി. രാജ്യത്തിന് നമ്മുടെ സഹായം വേണ്ട ഏറ്റവും വലിയ സമയമാണിത്. ഇപ്പോള്‍ നമുക്ക് ഒത്തു ചേരാം എന്ന കുറിപ്പോടെയാണ് സാനിയ ക്യാംപെയ്‌നു തുടക്കമിട്ടത്.

നേരത്തെ ക്രിക്കറ്റ് താരം വിരാട് കൊഹ്ലിയും ഭാര്യ അനുഷ്‌കാ ശര്‍മയും സഹായവുമായി രംഗത്ത് വന്നിരുന്നു.വിരാട് കൊഹ്ലിയും ഭാര്യ അനുഷ്‌കാ ശര്‍മയും ചേര്‍ന്നു കോവിഡ് പ്രതിരോധത്തിനായി നടത്തിയ ക്യാപെയ്‌നിലൂടെ രണ്ടു കോടി രൂപ സമാഹരിച്ചിരുന്നു.