കോവിഡ് മുക്തരെ കാത്ത് അപൂർവ ഫംഗസ് , അവഗണിക്കരുത് ഈ ലക്ഷണങ്ങൾ

കോവിഡ് വന്നു ഭേദമായവരിലും ആശങ്കയുണർത്തി മ്യൂകര്‍മൈകോസിസ് ഫംഗസ് ബാധ (ബ്ലാക് ഫംഗസ്). ശരിയായ ചികിത്സ ലഭിക്കാതിരുന്നാൽ ഇത് മരണത്തിന് പോലും കരണമായേക്കാമെന്നാണ് ഇന്ത്യന്‍ കൗണ്‍സില്‍ ഓഫ് മെഡികല്‍ റിസര്‍ചിന്റെ മുന്നറിയിപ്പ്.

മ്യൂകര്‍മൈകോസിസ് ബാധ പുതിയതായി രൂപം കൊണ്ടതല്ലെങ്കിലും കോവിഡ് രോഗികളില്‍ ഇത് തുടർച്ചയായി റിപ്പോർട്ട് ചെയ്യപ്പെടുന്നത് ആരോഗ്യരംഗത്തിന് ഭീഷണിയാവുകയാണ്. പ്രതിരോധ ശേഷി കുറഞ്ഞവരിലാണ് ഈ ഫംഗസ് പിടിമുറുക്കുന്നത്. തലയോട്ടിക്കുള്ളിലെ അറകളെയോ ശ്വാസകോശത്തെയോ ഇത് പ്രതികൂലമായി ബാധിക്കാം.

യുഎസിലെ സെന്റര്‍ ഫോര്‍ ഡിസീസ് കണ്‍ട്രോള്‍ ആന്‍ഡ് പ്രിവന്‍ഷന്റെ കണക്കു പ്രകാരം 54% വരെയാണ് മരണനിരക്ക്. കണ്ണ്, മൂക്ക് എന്നിവയ്ക്കു ചുറ്റും ചുവപ്പ് , വേദന, പനി, തലവേദന, ചുമ, ശ്വാസംമുട്ടല്‍, രക്തം ഛര്‍ദിക്കല്‍, മാനസിക നിലയില്‍ ഉണ്ടാകുന്ന മാറ്റം തുടങ്ങിയവയാണ് ഇതിന്റെ പ്രധാന ലക്ഷണങ്ങൾ.

അനിയന്ത്രിത പ്രമേഹ രോഗികൾ , പ്രതിരോധ ശേഷി കുറഞ്ഞവര്‍, ദീര്‍ഘനാള്‍ ആശുപത്രി ഐസിയുവില്‍ കഴിഞ്ഞവര്‍, കാന്‍സര്‍ രോഗികള്‍, അവയവമാറ്റ ശസ്ത്രക്രിയയ്ക്കു വിധേയരായവര്‍ എന്നിവരിലാണ് ഈ ഫംഗസ് ബാധ കൂടുതലായും കാണുന്നത്.
മൂക്കടഞ്ഞിരിക്കുകയോ തടസം തോന്നുകയോ ചെയ്യുക, മൂക്കില്‍ നിന്നു കറുപ്പു നിറത്തിലുള്ളതോ രക്തം കലര്‍ന്നതോ ആയ സ്രവം, മുഖത്തിന്റെ ഒരു ഭാഗത്തു വേദന, തരിപ്പ്, വീക്കം എന്നിവ അനുഭവപ്പെടുക, അണ്ണാക്ക്, മൂക്കിന്റെ പാലം എന്നിവയില്‍ കറുപ്പുകലര്‍ന്ന നിറവ്യത്യാസം, പല്ലുവേദന, പല്ല് കൊഴിയല്‍, താടിയെല്ലിനു വേദന, മങ്ങിയ കാഴ്ച, പനി, തൊലിപ്പുറത്ത് ക്ഷതം, നെഞ്ചുവേദന, ശ്വാസമെടുക്കാനുള്ള ബുദ്ധിമുട്ട് തുടങ്ങിയവയും ലക്ഷണങ്ങളാണ്.

തടയാം മുൻകരുതലുകളിലൂടെ…

*തേച്ചുകുളിക്കുന്നതുള്‍പെടെ വ്യക്തിശുചിത്വം പാലിക്കുക.
*പൊടിപിടിച്ച സ്ഥലങ്ങളില്‍ മാസ്ക് ഉപയോഗിക്കുക.
*കോവിഡ് മുക്തി നേടിയവരും പ്രമേഹരോഗികളും രക്തത്തിലെ ഗ്ലൂകോസ് നില ഇടവിട്ടു പരിശോധിക്കണം, സ്റ്റിറോയ്ഡ് മരുന്നുകള്‍ *ഉപയോഗിക്കുന്നവരാണെങ്കില്‍ അളവ്, ഇടവേള എന്നിവ കൃത്യമായി പാലിക്കണം.
*ആവി പിടിക്കുന്നതിനു ശുചിയായ വെള്ളം ഉപയോഗിക്കുക.
*രോഗലക്ഷണങ്ങളെ അവഗണിക്കരുത്.
*ഡോക്ടര്‍ നിര്‍ദേശിക്കുന്നുണ്ടെങ്കില്‍ ഫംഗസ് സാന്നിധ്യം കണ്ടെത്തുന്നതിനുള്ള പരിശോധനകളോട് ഉപേക്ഷ വിചാരിക്കരുത്.