പത്മജ തൃശൂരില്‍ പ്രചാരണത്തിനിറങ്ങും, മറിച്ചുള്ള വാർത്തകൾ തെറ്റ്, പത്മജയ്‌ക്കൊപ്പം പാര്‍ട്ടി തീരുമാനിക്കുന്ന വേദികള്‍ പങ്കിടും – സുരേഷ് ഗോപി

തൃശൂർ‌ . കോൺഗ്രസ് വിട്ടെത്തിയ പത്മജ വേണുഗോപാൽ ബിജെപിയുടെ തെരഞ്ഞെടുപ്പ് പ്രചാരണത്തിൽ പങ്കെടുക്കില്ലെന്ന വാർത്ത നിഷേധിച്ച് സുരേഷ് ഗോപി. പത്മജയെ തൃശൂരിൽ തെരഞ്ഞെടുപ്പു പ്രചാരണത്തിന് ഇറക്കേണ്ടെന്നാണ് ബിജെപി തീരുമാനമെന്ന തരത്തിലായിരുന്നു പുറത്തു വന്ന വാർത്തകൾ. എന്നാൽ അങ്ങനെയൊരു ചിന്ത ബിജെപിക്കുണ്ടായിരുന്നെങ്കില്‍ പത്മജയെ പാര്‍ട്ടിയിലേക്ക് എടുക്കില്ലെന്ന് സുരേഷ് ഗോപി പറഞ്ഞു.

പത്മജയെ പാര്‍ട്ടിയിലേക്ക് സ്വീകരിച്ചത് കേന്ദ്ര നേതൃത്വമാണ്. അതില്‍ കേരളനേതാക്കള്‍ക്ക് പങ്കില്ല. തന്നെ സ്ഥാനാര്‍ഥിയാക്കി തീരുമാനിച്ചിട്ടുണ്ടെങ്കില്‍ ആ നേതൃത്വം പറയുന്നതാകും താന്‍ അനുസരിക്കുക. പത്മജ വേണുഗോപാല്‍ തന്റെ സഹോദരിയുടെ സ്ഥാനത്താണ്.

പത്മജയ്‌ക്കൊപ്പം പാര്‍ട്ടി നിശ്ചയിക്കുന്ന വേദികള്‍ പങ്കിടും. ഇത് കല്യാണിക്കുട്ടിയമ്മയ്‌ക്കുള്ള സമര്‍പ്പണമാണെന്നും ബിജെപി സ്ഥാനാർഥി വ്യക്തമാക്കി. പാർട്ടി പറഞ്ഞാൽ സുരേഷ് ഗോപിക്കായി വോട്ട് തേടുമെന്ന് കഴിഞ്ഞ ദിവസം പത്മജ വേണുഗോപാൽ പറഞ്ഞിരുന്നു. തൃശൂരിൽ സുരേഷ് ഗോപി തന്നെ ജയിക്കുമെന്നും അവർ വ്യക്തമാക്കിയിരുന്നു.