ആൾമാറാട്ടം നടത്തി പിഎസ്‌സി പരീക്ഷ എഴുതാനെത്തിയ ആൾ ഹാൾ ടിക്കറ്റും ബയോ മെട്രിക്കും പരിശോധിക്കുന്നതിനിടെ പരീക്ഷ ഹാളിൽ നിന്ന് ഇറങ്ങി ഓടി

തിരുവനന്തപുരം . ആൾമാറാട്ടം നടത്തി പിഎസ്‌സി പരീക്ഷ എഴുതാനെത്തിയ ആൾ ഹാൾ ടിക്കറ്റും ബയോ മെട്രിക്കും പരിശോധിക്കുന്നതിനിടെ പരീക്ഷ ഹാളിൽ നിന്ന് ഇറങ്ങി ഓടി. യൂണിവേഴ്സിറ്റി ലാസ്റ്റ് ഗ്രേഡ് (മെയിൻ) പരീക്ഷ നടക്കവെയാണ് തട്ടിപ്പു ശ്രമം അരങ്ങേറിയത്. തിരുവനന്തപുരം പൂജപ്പുര ചിന്നമ്മ മെമ്മോറിയൽ ഗേൾസ് ഹൈസ്കൂളിൽ നടന്ന പരീക്ഷയ്ക്കിടെ തട്ടിപ്പിനെത്തി രക്ഷപ്പെട്ട ആളെ തിരിച്ചറിയാനുള്ള ശ്രമം പൊലീസ് നടത്തി വരുകയാണ്.

പി എസ് സി പരീക്ഷയിൽ സംസ്ഥാനത്ത് ആദ്യമായി ബയോമെട്രിക് പരിശോധന നടപ്പാക്കിയ പരീക്ഷയിലാണ് ആള്‍മാറാട്ടശ്രമം ഉണ്ടായിരിക്കുന്നത്. രാവിലെ 7.15 മുതൽ 9.15വരെയായിരുന്നു പരീക്ഷ. 52,879 പേരാണ് സംസ്ഥാന തലത്തിൽ നടക്കുന്ന പരീക്ഷ എഴുതുക. ഹാൾടിക്കറ്റിലെ ഫോട്ടോയും പരീക്ഷ എഴുതാനെത്തിയ ആളെയും പരീക്ഷാ ഡ്യൂട്ടിയിലുള്ള ഉദ്യോഗസ്ഥർ ആദ്യം പരിശോധിക്കും. തുടർന്ന് ബയോമെട്രിക് പരിശോധനയും നടക്കും.

ആധാർ ലിങ്ക് ചെയ്തവരുടെ ഡേറ്റയാണ് ബയോമെട്രിക് പരിശോധ നയിലൂടെ വിലയിരുത്തുക. രേഖകൾ പരിശോധിക്കാൻ ഇൻവിജി ലേറ്റർ അടുത്തെത്തിയപ്പോഴാണ് യുവാവ് പരീക്ഷ ഹാളിൽ നിന്ന് പുറത്തേക്ക് ഓടി രക്ഷപ്പെടുന്നത്. പിഎസ്‌സി ജീവനക്കാർ പുറകേ ഓടിയെങ്കിലും പുറത്ത് സ്റ്റാർട്ട് ചെയ്ത് നിർത്തിയിട്ടിരുന്ന ബൈക്കിൽ കയറി യുവാവ് രക്ഷപ്പെടുകയായിരുന്നു.

പിഎസ്‍സി ഇത് സംബന്ധിച്ച് പരാതി നൽകുമെന്ന് പിഎസ്‌സി അധികൃതർ പറഞ്ഞു. സീറ്റിൽ ഹാൾ ടിക്കറ്റ് നമ്പർ രേഖപ്പെടുത്തിയിരുന്നതിനാൽ ഇറങ്ങി ഓടിയ ആളെ വളരെ പെട്ടെന്ന് കണ്ടെത്താൻ കഴിയും. പിഎസ്‍സി പരീക്ഷയ്ക്ക് അപേക്ഷിച്ച ആൾക്കുപകരമായി പരീക്ഷ എഴുതാനെത്തിയ ആളെ ഹാൾ ടിക്കറ്റ് നമ്പരിലൂടെ അപേക്ഷിച്ച ആളെ കണ്ടെത്തി പിടികൂടാവുന്നതേ ഉള്ളൂ. ഹാൾ ടിക്കറ്റ് ഉടമയെ ചോദ്യം ചെയ്യുന്നതിലൂടെ ഇറങ്ങി ഓടിയ ആളെ പിടികൂടാം.