എസ്എഫ്‌ഐ കോലം കത്തിച്ചതില്‍ അത്ഭുതമില്ല, അവർ പലരെയും കൊന്ന പാരമ്പര്യം ഉള്ളവർ – ഗവര്‍ണര്‍ ആരിഫ് മുഹമ്മദ് ഖാന്‍

തിരുവനന്തപുരം . കണ്ണൂരില്‍ എസ്എഫ്‌ഐ നേതാക്കള്‍ തന്റെ കോലം കത്തിച്ചതില്‍ അത്ഭുതമില്ലെന്നും പലരെയും കൊന്ന പാരമ്പര്യം ഉള്ളവരാണെന്നും ഗവര്‍ണര്‍ ആരിഫ് മുഹമ്മദ് ഖാന്‍. അവര്‍ കാണിക്കുന്നത് അവരുടെ സംസ്‌കാരമാണ്. മുഖ്യമന്ത്രിയാണ് പ്രതിഷേധങ്ങള്‍ക്ക് അനുമതി നല്‍കുന്നത് – ഗവര്‍ണര്‍ ആവര്‍ത്തിച്ചു പറഞ്ഞു . രാത്രിയോടെ തലസ്ഥാനത്തെത്തിയ ഗവർണർ മാധ്യമപ്രവര്‍ത്തകരോട് സംസാരിക്കുകയായിരുന്നു.

അവരെന്തിനാണ് ഈ നാടകം തുടരുന്നതെന്ന് മനസിലാകുന്നില്ല. ആക്രമണം നടത്തിയവരെ മുഖ്യമന്ത്രി തന്നെ പിന്തുണക്കുകയാണ്. ഇത് മുഖ്യമന്ത്രിയുടെ പങ്കാണ് സൂചിപ്പിക്കുന്നത്. കോലം മാത്രമേ കത്തിച്ചിട്ടുള്ളു, പക്ഷേ കണ്ണൂരില്‍ പലരെയും ജീവനോടെ കൊന്നിട്ടില്ലേ എന്നും ഗവര്‍ണര്‍ ചോദിച്ചു. ബില്ലുകളില്‍ ഒപ്പിടാതിരിക്കുന്നതിനെ പറ്റി പത്രലേഖകരുടെ ചോദ്യങ്ങൾക്ക് ബില്ലുകളില്‍ വ്യക്തത വരുത്തിയാല്‍ അതില്‍ ഒപ്പിടുമെന്നും ആരിഫ് മുഹമ്മദ് ഖാന്‍ വ്യക്തമാക്കി.

കണ്ണൂര്‍ പയ്യാമ്പലത്താണ് പാപ്പാഞ്ഞി മാതൃകയില്‍ ഗവര്‍ണറുടെ കോലം കത്തിച്ച സംഭവത്തില്‍ എസ്എഫ്‌ഐ നേതാക്കള്‍ക്കെതിരെ പൊലീസ് കേസെടുത്തിട്ടുണ്ട്. മുഖ്യമന്ത്രിയാണ് തന്നെ അക്രമിക്കാന്‍ നിര്‍ദ്ദേശം നല്കുന്നതെന്ന് നിരവധി തവണ ഗവര്‍ണര്‍ ഇതോടെ ആവര്‍ത്തിച്ചിരിക്കുകയാണ്.