300 രൂപയുടെ ലിപ്സ്റ്റിക് ഓണ്‍ലൈനില്‍ ഓര്‍ഡര്‍ ചെയ്ത വനിതാ ഡോക്ടര്‍ക്ക് സൈബര്‍ തട്ടിപ്പിൽ പോയത് ഒരുലക്ഷം രൂപ

300 രൂപയുടെ ലിപ്സ്റ്റിക് ഓണ്‍ലൈനില്‍ ഓര്‍ഡര്‍ കൊടുത്ത വനിതാ ഡോക്ടര്‍ക്ക് സൈബര്‍ തട്ടിപ്പിലൂടെ ഒരുലക്ഷം രൂപ നഷ്ടപ്പെട്ടു. നവിമുംബൈ സ്വദേശിയായ വനിതാ ഡോക്ടറെയാണ് ഓൺലൈൻ തട്ടിപ്പ് സംഘം കബളിപ്പിച്ച് പണം തട്ടിഎടുത്തത്. കഴിഞ്ഞ നവംബര്‍ രണ്ടാം തീയതി ഡോക്ടർ ഒരു ഇ-കൊമേഴ്‌സ് വെബ്‌സൈറ്റില്‍ 300 രൂപ വിലയുള്ള ഒരു ലിപ്‌സ്റ്റിക് ഓര്‍ഡര്‍ ചെയ്ത പിറകേയാണിത്.

കൊറിയര്‍ കമ്പനിയുടേതെന്ന പേരില്‍ ഓർഡ്ർ ചെയ്ത പ്രൊഡക്റ്റ് ഡെലിവെറി ഡേറ്റിന് മുന്നേ ഡെലിവറി ചെയ്തതതായുള്ള സന്ദേശം ഡോക്ടറുടെ ഫോണിൽ എത്തുകയായിരുന്നു. എന്നാല്‍, സാധനം കിട്ടാതെ ഡെലിവറി ചെയ്‌തെന്ന സന്ദേശം ലഭിച്ചതോടെ വനിതാ ഡോക്ടര്‍ സന്ദേശത്തിലുണ്ടായിരുന്ന നമ്പറില്‍ വിളിച്ചു നോക്കി. കമ്പനിയുടെ കസ്റ്റമര്‍കെയര്‍ എക്‌സിക്യൂട്ടിവ് തിരികെ വിളിക്കുമെന്നായിരുന്നു കിട്ടിയ മറുപടി. പിന്നാലെ കസ്റ്റമര്‍കെയര്‍ എക്‌സിക്യൂട്ടിവെന്ന പേരില്‍ ഒരാള്‍ ഡോക്ടറെ വിളിക്കുകയുണ്ടായി.

തുടർന്നാണ് തട്ടിപ്പ് അരങ്ങേറുന്നത്. താങ്കളുടെ ഓര്‍ഡര്‍ പിടിച്ചുവെച്ചിരിക്കുകയാണെന്നും ലഭിക്കണമെങ്കിൽ രണ്ടുരൂപ കൂടി അടയ്ക്കണം എന്നുമായിരുന്നു കസ്റ്റമര്‍കെയര്‍ എക്‌സിക്യൂട്ടിവ് പറയുന്നത്. ഇതിനായി ബാങ്ക് വിവരങ്ങള്‍ കൈമാറാനായി ഒരുലിങ്കും അയച്ചു കൊടുത്തു. ലിങ്കിൽ ക്ലിക്ക് ചെയ്തതോടെ ഒരു ആപ്പ് മൊബൈലിൽ ഡൌൺലോഡ് ആവുകയായിരുന്നു. ഇത് വനിതാ ഡോക്ടർ അറിഞ്ഞിരുന്നില്ല. രണ്ട് രൂപ അടച്ചതോടെ പ്രൊഡക്ട് ഉടനെത്തുമെന്ന് പറഞ്ഞു കൊണ്ട് വിളിച്ചയാൾ ഫോൺ വെക്കുകയായിരുന്നു.

പിന്നീട് നവംബർ 9ന് ബാങ്ക് അക്കൗണ്ടിൽ നിന്നും ആദ്യം 95,000 രൂപയും തുടർന്ന് 5000 രൂപയും നഷ്ടപ്പെട്ടു. അതിന്റെ മൊബൈൽ സന്ദേശവും എത്തി. അക്കൗണ്ട് പരിശോധിച്ചപ്പോള്‍ താനറിയാതെ ഒരു ലക്ഷം രൂപ നഷ്ടപ്പെട്ടതായി ഡോക്ടർക്ക് മനസിലാക്കാനായി. ഇതോടെ താൻ നേരിട്ട തട്ടിപ്പ് ഡോക്ടർ തിരിച്ചറിഞ്ഞു. ഇതോടെ വനിതാ ഡോക്ടർ പൊലീസിൽ പരാതി നൽകി. സംഭവത്തിൽ കേസെടുത്തി ട്ടുണ്ടെന്നും അന്വേഷണം ആരംഭിച്ചിട്ടുണ്ടെന്നും ആണ് പൊലീസ് നൽകിയിരിക്കുന്ന മറുപടി.