വീണക്കിന്ന് നിർണായക ദിനം, എസ്എഫ്ഐഒ അന്വേഷണം കർണാടക ഹൈക്കോടതി റദ്ദാക്കുമോ?

ബംഗളൂരു. കേരളത്തിലെ ഏറ്റവും അഴിമതിയായി വിലയിരുത്തപ്പെടുന്ന മാസപ്പടി കേസിൽ എസ്എഫ്ഐഒ അന്വേഷണം കർണാടക ഹൈക്കോടതി റദ്ദാക്കുമോ എന്ന് ഉറ്റുനോക്കുകയാണ് കേരളത്തിലെ ജനങ്ങൾ. അന്വേഷണം റദ്ദാക്കണമെന്നാവശ്യപ്പെട്ട് മുഖ്യമന്ത്രി പിണറായി വിജയന്‍റെ മകൾ വീണയുടെ ഉടമസ്ഥതയിലുള്ള എക്സാലോജിക് കമ്പനി നൽകിയ ഹർജി കർണാടക ഹൈക്കോടതി ഇന്ന് പരിഗണിക്കുകയാണ്.

ജസ്റ്റിസ് നാഗപ്രസന്നയുടെ ബഞ്ചാണ് ഹർജി പരിഗണിക്കുക. എസ്എഫ്ഐഒ ഡയറക്ടർക്ക് വേണ്ടി ഹാജരാകുന്നത് കർണാടകയുടെ അഡീഷണൽ സോളിസിറ്റർ ജനറൽ എഎസ്‍ജി കുളൂർ അരവിന്ദ് കാമത്ത് ആണ്. കർണാടക ഹൈക്കോടതിയിൽ ജസ്റ്റിസ് നാഗപ്രസന്നയുടെ ബഞ്ചിൽ ഉച്ചയോടെ കേസ് പരിഗണനയ്ക്ക് വരുമ്പോൾ ഇതേ കേസിൽ മറ്റു രണ്ടു ഹർജികൾ കേരള ഹൈക്കോടതിയിൽ എത്തുന്നുണ്ട്.

സത്യത്തിൽ കേരളത്തിലെ കരിമണൽ കട്ട് മുടിക്കുന്ന കരിമണൽ കുംഭകോണമാണ് കേസിനാധാരം. കേസ് സീരിയസ് ഫ്രോഡ് ഇൻവെസ്റ്റിഗേഷൻ ഓഫീസിന് കൈമാറിക്കൊണ്ടുള്ള കേന്ദ്ര കോ‍ർപ്പറേറ്റ് കാര്യമന്ത്രാലയത്തിന്‍റെ ഉത്തരവ് റദ്ദാക്കണമെന്നാണ് ഹർജിയിൽ മുഖ്യമന്ത്രിയുടെ മകൾ വീണയുടെ ആവശ്യം.

കമ്പനി കാര്യനിയമത്തിലെ ചട്ടം 210 പ്രകാരം ആദ്യം റജിസ്ട്രാർ ഓഫ് കമ്പനീസിന്‍റെ നേതൃത്വത്തിൽ അന്വേഷണം പ്രഖ്യാപിക്കുകയും അത് നിലനിൽക്കേ തന്നെ ചട്ടം 212 പ്രകാരം സ്എഫ്ഐഒ അന്വേഷണം പ്രഖ്യാപിക്കുകയും ചെയ്തത് നിയമപ്രകാരമല്ലെന്ന് കമ്പനി വാദിക്കുന്നു. ലോക്സഭാ തെരഞ്ഞെടുപ്പ് അടുത്തിരിക്കേ മാസപ്പടി വിവാദം സംസ്ഥാനസർക്കാരിനെയും സിപിഎമ്മിനെയും വെട്ടിലാക്കുന്ന സാഹചര്യത്തിലാണ് നിർണായകമായ ഹർജി കർണാടക ഹൈക്കോടതിയുടെ പരിഗണനയ്ക്ക് വരുന്നത്.