വീണയെ സംരക്ഷിക്കാൻ ശ്രമിച്ചാൽ കേന്ദ്ര ഏജൻസി തുറന്നുകാട്ടപ്പെടുമെന്ന് മാത്യു കുഴൽനാടന്റെ മുന്നറിയിപ്പ്

കൊച്ചി . വീണയെ സംരക്ഷിക്കാൻ ശ്രമിച്ചാൽ കേന്ദ്ര ഏജൻസി തുറന്നുകാട്ടപ്പെടുമെന്ന് മാത്യു കുഴൽനാടൻ എംഎൽഎ. CMRL മാസപ്പടി ആരോപണത്തിൽ നടക്കുന്ന കേന്ദ്ര അന്വേഷണത്തിൽ മുഖ്യമന്ത്രി പിണറായി വിജയന്റെ മകൾ വീണാ വിജയന് ക്ലീൻ ചിറ്റ് ലഭിക്കില്ലെന്നും ഒരു ഓൺലൈൻ ചാനലിന്റെ ‘വാട്‍സ് യുവർ പോയിന്റ്?’ അഭിമുഖത്തിൽ പറഞ്ഞു. ഒപ്പം മാത്യു കുഴൽനാടൻ എംഎൽഎ. കേന്ദ്ര കോർപറേറ്റ് മന്ത്രാലയത്തിന്റെ അന്വേഷണത്തേക്കുറിച്ചുള്ള സംശയങ്ങൾ ആവർത്തിച്ചിട്ടുണ്ട്.

‘മുൻകാല സംഭവങ്ങളിലെ കേന്ദ്ര ഏജൻസികളുടെ സമീപനം വിലയിരുത്തുമ്പോൾ, കേന്ദ്ര സർക്കാരും കേന്ദ്ര ഏജൻസികളും അന്വേഷണം നടത്തുന്നതിൽ സത്യസന്ധത പുലർത്തുന്നില്ലെന്ന് വിശ്വസിക്കാൻ ന്യായമായ കാരണങ്ങളുണ്ട്. കേന്ദ്ര ഏജൻസികൾക്ക് നേരിട്ട് ഇടപെട്ട് ബന്ധപ്പെട്ടവരെ പിടികൂടാമായിരുന്ന കൂടുതൽ വിവാദമായ സംഭവങ്ങൾ ഉണ്ട്. എന്നാൽ എല്ലായ്‌പ്പോഴും അവർ മെല്ലെപ്പോക്ക് സമീപനമാണ് സ്വീകരിച്ചത്. അതുകൊണ്ടാണ് ഈ അന്വേഷണത്തിന്റെ ഫലത്തേക്കുറിച്ച് സംശയം ഉള്ളത് ‘ – മാത്യു കുഴൽനാടൻ പറഞ്ഞു.

‘കേസിൽ വീണ വിജയന് ക്ലീൻ ചിറ്റ് നൽകുന്നത് ബുദ്ധിമുട്ടായിരിക്കും. അതിന് ഏജൻസികൾ ശ്രമിച്ചാൽ അവരും തുറന്നു കാട്ടപ്പെടും. പ്രകടമായ നിയമലംഘനങ്ങൾ നടന്ന കേസാണിത്.. ഭാഗ്യവശാലോ നിർഭാഗ്യവശാലോ പല ഇടപാടുകളും ഡിജിറ്റലാണ്. അത് രേഖകളിൽനിന്ന് നീക്കം ചെയ്യാൻ കഴിയില്ല. കേസ് വലിയൊരു പരിധിവരെ തെളിയിക്കപ്പെട്ടു. പ്രതികൾക്കെതിരെ കേസെടുത്ത് ശിക്ഷിക്കുന്നതിൽ നിയമം ഉചിതമായ നടപടി സ്വീകരിക്കുമോ എന്നത് മാത്രമാണ് ഇതിവിടെ അവശേഷിക്കുന്നത്’ മാത്യു കുഴൽനാടൻ പറഞ്ഞു.

മുഖ്യമന്ത്രിയെ താൻ ശത്രുവായിട്ടല്ല, രാഷ്ട്രീയ എതിരാളിയായി മാത്രമേ കണക്കാക്കുന്നുള്ളൂ. മുഖ്യമന്ത്രിക്കെതിരായ സമീപനത്തിൽ താൻ ശരിയായ പാതയിലാണെന്ന് വിശ്വസിക്കുന്നു. ‘മുഖ്യമന്ത്രിയു ടേയും കുടുംബാംഗങ്ങളുടേയും നിയമവിരുദ്ധമായ പല നടപടികളും ചോദ്യം ചെയ്യാൻ അവസരം ലഭിച്ചിട്ടുണ്ട്. ഒരു നിയമസഭാംഗമെന്ന നിലയിൽ അതിൽ സന്തോഷമുണ്ട്. തന്റെ ജോലി കഴിയുന്നത്ര കൃത്യമായി ചെയ്യുന്നുണ്ട്. – കുഴൽനാടൻ പറഞ്ഞു.