‘കേരളം കൊള്ളയടിച്ച് പി വി ആൻഡ് കമ്പനി’ വീണക്കെതിരായ SFIO അന്വേഷണം സഭ നിര്‍ത്തിവെച്ച് ചര്‍ച്ച ചെയ്യാത്തതിൽ പ്രതിഷേധിച്ച്പ്രതിപക്ഷ വാക്കൗട്ട്

തിരുവനന്തപുരം . മുഖ്യമന്ത്രി പിണറായി വിജയന്റെ മകള്‍ വീണ വിജയനെതിരായ എസ് എഫ് ഐ ഒ അന്വേഷണം സഭ നിര്‍ത്തിവെച്ച് ചര്‍ച്ച ചെയ്യണമെന്ന പ്രതിപക്ഷത്തിന്റെ അടിയന്തര പ്രമേയത്തിന് സ്പീക്കര്‍ അനുമതി നല്കാതിരുന്നതിനെ തുടർന്ന് പ്രതിപക്ഷ എം എല്‍ എമാര്‍ സഭയുടെ നടുത്തളത്തിലിറങ്ങി പ്രതിഷേധിച്ച് തുടർന്ന് സഭാ നടപടികള്‍ ബഹിഷ്‌കരിച്ച വാക്കൗട്ട് നടത്തി. സഭക്കുമുന്നില്‍ സമര്‍പ്പിച്ച അടിയന്തര പ്രമേയത്തിന് സ്പീക്കര്‍ അനുമതി നിഷേധി ച്ചതോടെ പ്രതിപക്ഷം പ്രതിഷേധിച്ച് ഇറങ്ങിപോവുകയായിരുന്നു.

നിയമസഭയില്‍ ചോദ്യോത്തര വേള തുടങ്ങിയ പിറകെ പ്രതിപക്ഷം അടിയന്തര പ്രമേയം കൊണ്ടുവക്കുകയായിരുന്നു. മുഖ്യമന്ത്രി പിണറായി വിജയന്‍ രാജിവെക്കണമെന്ന ആവശ്യമാണ് പ്രതിപക്ഷം നിയമസഭയില്‍ ഉന്നയിച്ചത്. മാത്യു കുഴല്‍നാടന്‍ എംഎല്‍എയാണ് അടിയന്തര പ്രമേയ നോട്ടീസ് കൊണ്ടുവന്നത്. റൂള്‍ 53 ചട്ട പ്രകാരം അടിയന്തര പ്രമേയത്തിന് അനുമതി നല്‍കാനാകില്ലെന്ന് സ്പീക്കര്‍ ഇതോടെ വ്യക്തമാക്കി. കോടതി പരിഗണനയിലുള്ള വിഷയം പരിഗണിക്കരുതെന്നാണ് ചട്ടമെന്നും സ്പീക്കര്‍ പറഞ്ഞു.

എന്നാല്‍ ചട്ടം ലംഘിക്കുന്നില്ലെന്നും ചട്ട പ്രകാരമാണ് അടിയന്തര പ്രമേയത്തിന് സ്പീക്കര്‍ അനുമതി തേടിയത് എന്നും പ്രതിപക്ഷ നേതാവ് വി ഡി സതീശന്‍ മറുപടി നല്‍കി. തുടര്‍ന്ന് അടിയന്തര പ്രമേയം തള്ളുകയായിരുന്നു. അടിയന്തര പ്രമേയത്തിന്റെ നോട്ടീസിന് പോലും അനുമതി നല്‍കാത്തത് അസാധാരണ നടപടിയെന്ന് ആരോപിച്ചാണ് പ്രതിപക്ഷം വാക്കൗട്ട് നടത്തിയത്. കേരളം കൊള്ളയടിച്ച് പി വി ആൻഡ് കമ്പനി എന്ന ബാനറുമായി ട്ടായിരുന്നു പ്രതിപക്ഷ വാക്കൗട്ട്.