കോൺഗ്രസ് അയോധ്യയിലേക്കില്ല ബിജെപിയും ആർഎസ്എസ്സും രാഷ്ട്രീയ നേട്ടമുണ്ടാക്കുന്നു രാമക്ഷേത്രമെന്ന രാഷ്ട്രീയപദ്ധതിയെന്ന് ഖാർഗെയും സോണിയയും

ജനുവരി 22 ന് നടക്കുന്ന അയോധ്യയിലെ രാമക്ഷേത്രത്തിന്റെ പ്രതിഷ്ഠാ ചടങ്ങില്‍ കോണ്‍ഗ്രസ് അധ്യക്ഷന്‍ മല്ലികാര്‍ജുന്‍ ഖാര്‍ഗെയും മുന്‍ അധ്യക്ഷ സോണിയാ ഗാന്ധിയും ലോക്‌സഭയിലെ കക്ഷിനേതാവ് അധീര്‍ രഞ്ജന്‍ ചൗധരിയും പങ്കെടുക്കില്ല. എഐസിസി ജനറല്‍ സെക്രട്ടറി ജയറാം രമേശിന്റെ പ്രസ്താവനയിലൂടെയാണ് ഇക്കാര്യം അറിയിച്ചത്. പ്രധാനമന്ത്രി നരേന്ദ്ര മോദി അടക്കമുള്ളവര്‍ പങ്കെടുക്കുന്നുണ്ട്. രാഷ്ട്രീയ നേട്ടമുണ്ടാക്കുന്നതിനാണ് ബിജെപിയും ആര്‍എസ്എസ്സും അയാധ്യയിലെ രാമക്ഷേത്രത്തെ ഉപയോഗിക്കുന്നതെന്ന് പ്രസ്താവനയില്‍ കുറ്റപ്പെടുത്തിയിട്ടുണ്ട്. . രാജ്യത്തെ ലക്ഷക്കണക്കിന് ജനങ്ങള്‍ ശ്രീരാമനെ ആരാധിക്കുന്നുണ്ട്. മതം ഓരോരുത്തരുടെയും വ്യക്തിപരമായ കാര്യമാണ്. എന്നാല്‍ ബിജെപിയും ആര്‍എസ്എസ്സും ദീര്‍ഘകാലമായി രാമക്ഷേത്രമെന്ന രാഷ്ട്രീയപദ്ധതി തയ്യാറാക്കുകയാണ്. നിര്‍മാണം പൂര്‍ത്തിയാകാത്ത ക്ഷേത്രത്തിന്റെ ഉദ്ഘാടനച്ചടങ്ങ് നടത്തുന്നത് രാഷ്ട്രീയ ലക്ഷ്യത്തോടെയാണ്. അതിനാല്‍ സുപ്രീം കോടതിവിധി മാനിച്ചുകൊണ്ടും രാജ്യത്തെ ലക്ഷക്കണക്കിന് വിശ്വാസികളുടെ വികാരം മാനിച്ചുകൊണ്ടും ഖാര്‍ഗെയും സോണിയയും അധീര്‍ രഞ്ജനും ബഹുമാനത്തോടെ ക്ഷണം നിരസിക്കുകയാണെന്ന് പ്രസ്താവനയില്‍ പറയുന്നു. ആര്‍.എസ് എസ്സി ന്റെയും ബിജെപിയുടെയും ചടങ്ങ് മാത്രമാണിതെന്നും പ്രസ്താവനയില്‍ കോണ്‍ഗ്രസ് ആരോപിക്കുന്നുണ്ട്. ഡിസംബർ മാസത്തിലാണ് 3
നേതാക്കന്മാരെയും രാമക്ഷേത്ര ഉദ്ഘാടന ചടങ്ങിലേക്ക് സംഘാടകര്‍ ക്ഷണിച്ചത്. എന്നാൽ ഇതുവരെ ഒരു വ്യക്തമായ മറുപടി കോൺഗ്രസ് നൽകിയില്ലായിരുന്നു.