‘ആലിബാബയും 41 കള്ളൻമാരും’ നവകേരള സദസ്സിനെതിരെ ഫേസ് ബുക്കിൽ ട്രോൾ : യൂത്ത് കോൺഗ്രസ് നേതാവിനെതിരെ കലാപാഹ്വാനത്തിന് കേസ്

തൃത്താല . നവകേരള യാത്രയെയും നവകേരള സദസ്സിനെയും മുഖ്യമന്ത്രിയെയും മന്ത്രിമാരെയും ഫേസ് ബുക്കിൽ ട്രോളിയ യൂത്ത് കോൺഗ്രസ് സംസ്ഥാന ജനറൽ സെക്രട്ടറി ഒ.കെ.ഫാറൂഖിനെതിരെ കേസെടുത്ത് തൃത്താല പൊലീസ്. മുഖ്യമന്ത്രി പിണറായി വിജയന്റെ നേതൃത്വത്തിലുള്ള നവകേരള യാത്രയെയും നവകേരള സദസ്സിനെയും മന്ത്രിമാരെയും വിമർശിച്ചതിനാണ് കേസ്.

യൂത്ത് കോൺഗ്രസ് നേതാവിനെതിരെ കലാപാഹ്വാനത്തിനാണ് പോലീസ് കേസ് എടുത്തിരിക്കുന്നത്. നവകേരള സദസിനെ ‘ട്രോളി’ ഫെയ്സ്ബുക്കിൽ പങ്കുവച്ച ചിത്രവും കുറിപ്പുമാണ് കേസിന് ആരാധാരമെന്നു പറയുന്നു. തൃത്താലയിലെ ചില സിപിഎം നേതാക്കൾ ഫാറൂഖിനെതിരെ പരാതി നൽക്കുകയായിരുന്നു.;

നവകേരള യാത്ര പാലക്കാട് ജില്ലയിലേക്ക് കടക്കുമ്പോഴാണ്‌ ഫാറൂഖ് തന്റെ ഫെയ്സ്ബുക്ക് പേജിൽ നവകേരള യാത്രയെ പരിഹസിക്കുന്ന ചിത്രവും കുറിപ്പും അടക്കം ട്രോൾ പോസ്റ്റ് ചെയ്യുന്നത്. ‘ആലിബാബ യും 41 കള്ളൻമാരും’ എന്ന തലക്കെട്ടിൽ നവകേരള ബസിന്റെ മാതൃകയിലുള്ള ചിത്രമാണ് ഫാറൂഖ് പങ്കുവച്ചത്. എന്നാൽ ബസ്സിൽ ആരും ഉണ്ടായിരുന്നില്ല. ‘നവകേരള സദസ്സിൽ വൻ ജനക്കൂട്ടം: മുഖ്യമന്ത്രി – പോക്കറ്റടിക്കാരെയും കള്ളന്മാരെയും ആകാംക്ഷയോടെ കാണാൻ ജനം കൂടുന്നത് സ്വാഭാവികം’ എന്നു ഫാറൂഖ് കുറിക്കുകയും ഉണ്ടായി.

ഈ പോസ്റ്റ് ഫെയ്സ്ബുക്കിൽ വ്യാപകമായി ഷെയർ ചെയ്യപ്പെട്ടിരുന്നു. ഇതിനു പിറകെയാണ് സിപിഎം നേതാക്കൾ പരാതിയുമായി രംഗത്ത് വരുന്നത്. മുഖ്യമന്ത്രിയെയും മന്ത്രിമാരേയും ബോധപൂർവം കള്ളൻമാരായി ചിത്രീകരിക്കാൻ ശ്രമിച്ചെന്നാണ് പരാതി എഴുതി നൽകിയിരിക്കുന്നത്. പരാതി ലഭിച്ച പിന്നാലെ തൃത്താല പൊലീസ് ഫാറൂഖിനെ വിളിച്ച് വരുത്തി മൊഴി രേഖപ്പെടുത്തി. തുടർന്ന് കേസ് റജിസ്റ്റർ ചെയ്യുകയാണ് ഉണ്ടായത്.