പിണറായി സർക്കാരിന് വമ്പൻ തിരിച്ചടി, നവകേരള സദസിന് തദ്ദേശ സ്ഥാപനങ്ങൾ പണം നൽകണമെന്ന ഉത്തരവ് ഹൈക്കോടതി സ്റ്റേ ചെയ്തു

കൊച്ചി . നവകേരള സദസിന് തദ്ദേശ സ്ഥാപനങ്ങൾ പണം നൽകണമെന്ന സർക്കാർ ഉത്തരവ് ഹൈക്കോടതി സ്റ്റേ ചെയ്തു. പഞ്ചായത്ത് ഭരണ സമിതി തീരുമാനത്തിന് വിരുദ്ധമായി സെക്രട്ടറിമാർ ഫണ്ട് അനുവദിക്കരുതെന്ന് ഹൈക്കോടതി നിര്‍ദ്ദേശിക്കുകയും ചെയ്തിട്ടുണ്ട്. മലപ്പുറം, കോഴിക്കോട് ജില്ലകളിലെ വിവിധ പഞ്ചായത്ത് പ്രസിഡന്റുമാർ നൽകിയ ഹർജിയിലാണ് ഹൈക്കോടതി നിർദേശം ഉണ്ടായിരിക്കുന്നത്. കേസിൽ ഉൾപ്പെട്ട പഞ്ചായത്ത് സെക്രട്ടറിമാർക്ക് നോട്ടീസ് അയച്ച കോടതി, കേസ് ഡിസംബർ ഏഴിന് പരിഗണിക്കാനായി മാറ്റിയിരിക്കുകയാണ്.

നവകേരള സദസിന്റെ പേരിൽ സഹകരണ സംഘങ്ങളെയും തദ്ദേശ സ്ഥാപനങ്ങളെയും പിഴിഞ്ഞെടുക്കാനായിരുന്നു പിണറായി സർക്കാരിന്റെ നീക്കം. സർക്കാർ നീക്കം. തദ്ദേശ സ്ഥാപനങ്ങളുടെ തനത് ഫണ്ടിൽ നിന്ന് പണം നൽകാൻ ക്വാട്ട നിശ്ചയിച്ചായിരുന്നു അഡീഷനൽ ചീഫ് സെക്രട്ടറി ഇതിനായി ഉത്തരവ് പുറപ്പെടുവിച്ചിരുന്നത്.

ഗ്രാമപഞ്ചായത്തുകൾ അൻപതിനായിരവും മുൻസിപ്പാലിറ്റികളും ബ്ലോക്ക് പഞ്ചായത്തുകളും ഒരു ലക്ഷവും കൊടുക്കാനായിരുന്നു സർക്കാർ നിർദേശം. കോർപ്പറേഷനുകൾ രണ്ട് ലക്ഷവും ജില്ലാ പഞ്ചായത്തുകൾ 3 ലക്ഷം വീതവും നൽകാനാണ് നിർദേശിച്ചിരുന്നത്. പണം സംഘാടക സമിതി ആവശ്യപ്പെടുന്നതനുസരിച്ച് നൽകണമെന്നും പറഞ്ഞിരുന്നു. സാമ്പത്തിക പ്രതിസന്ധിയിലായ തദ്ദേശസ്ഥാപനങ്ങളെ കൂടുതൽ കടക്കെണിയിലാക്കുന്ന സ‍ർക്കാ‍ർ തീരുമാനത്തിനെതിരെ വ്യാപകമായ തോതിൽ പ്രതിഷേധം ഉയർന്നിരുന്നു. ഇതിനിടെയാണ് ഹൈക്കോടതിയുടെ ജനകീയമെന്നു തീർത്തും പറയാവുന്ന ഉത്തരവ് ഉണ്ടായിരിക്കുന്നത്.