ഇരിക്കുന്ന കൊമ്പ് വെട്ടുമ്പോള്‍ സൂക്ഷിക്കണം,കെടി ജലീലിന് വധഭീഷണി

മുന്‍ മന്ത്രിയും എംഎല്‍എയുമായി കെടി ജലീലിന് ഭീഷണി സന്ദേശമെത്തിയ സംഭവം ചര്‍ച്ചാവിഷയമാകുന്നു. വാട്‌സ് ആപ്പ് ശബ്ദ സന്ദേശമായാണ് എംഎല്‍എയുടെ ഫോണിലേക്ക് എത്തിയിരുന്നത്. കെടി ജലീലിനെ കൊല്ലുമെന്നു തന്നെയാണ് ഭീഷണിയുള്ളത്. ദിവസങ്ങളായി മുസ്ലിം ലീഗിനെതിരെ ആരോപണങ്ങള്‍ ഉന്നയിക്കുന്നതിന്റെ ഭാഗമായാണ് ഭീഷണി സന്ദേശം എത്തിയതെന്നാണ് വിലയിരുത്തല്‍. വാഹനാപകടമുണ്ടാക്കി കൊലപ്പെടുത്തുമെന്നാണ് ഭീഷണിയെന്ന് വ്യക്തമാണന്ന് കെ.ടി. ജലീല്‍ പറഞ്ഞു. സിപിഎമ്മിന്റെ ഒപ്പം ചേര്‍ന്നുളള നീക്കങ്ങള്‍ അവസാനിപ്പിക്കണമെന്നും വാഹനത്തില്‍ ഒരുപാട് യാത്രചെയ്യുന്നയാളാണ് അത് മറന്ന് പോകരുതെന്നും ശബ്ദ സന്ദേശത്തിലുണ്ട്.

ഹംസ എന്ന പേര് പറഞ്ഞാണ് ഇയാള്‍ സംസാരിക്കുന്നത്. ഈ ദിവസം ഓര്‍മ്മയില്‍ വെച്ചോ എന്നും കൊലപ്പെടുത്തുമെന്നും ഫോണ്‍ സന്ദേശത്തിലുണ്ട്. ഇരിക്കുന്ന കൊമ്പാണ് വെട്ടുന്നതെന്ന് ഓര്‍മ്മ വേണമെന്നും തറവാട് മാന്തുമെന്നുമൊക്കെയുള്ള വധഭീഷണിയാണ് ഉള്ളത്. നീ അവിടെ ഇവിടെയൊക്കെ തെണ്ടി നടക്കുന്നവനാ, അതോര്‍മ്മിച്ച് കളിച്ചാല്‍ മതിയെന്നൊക്കെ പറയുന്നുണ്ട്. ദിവസം എണ്ണി തുടങ്ങിക്കോ എന്നും ഓഡിയോയില്‍ വ്യക്തമാണ്.

സംഭവത്തില്‍ എംഎല്‍എയുടെ പേഴ്‌സണല്‍ അസിസ്റ്റന്റ് ഡിജിപിക്ക് പരാതി നല്‍കി. തെളിവും പൊലീസിന് കൈമാറിയിട്ടുണ്ട്. മുസ്ലീം ലീഗിലെ പ്രശ്നങ്ങളുമായി ബന്ധപ്പെട്ട് പി.കെ. കുഞ്ഞാലിക്കുട്ടിക്കെതിരെയും ചില ലീഗ് നേതാക്കള്‍ക്കെതിരെയും രൂക്ഷവിമര്‍ശനവുമായി ജലീല്‍ രംഗത്തുവന്നിരുന്നു. തന്നോടുളള രാഷ്ട്രീയ ശത്രുതയുടെ ഭാഗമായാണ് വധഭീഷണി എന്ന നിഗമനത്തിലാണ് കെ.ടി. ജലീല്‍. മലപ്പുറത്തുനിന്നു തന്നെയാണ് ഈ ഭീഷണി സന്ദേശം എത്തിയിട്ടുള്ളതെന്നാണ് ജലീല്‍ പറയുന്നത്.