ഉമ്മന്‍ചാണ്ടിക്കെതിരെ കേസെടുത്തവര്‍ക്ക് കാലം മുഖം അടച്ചു കൊടുത്ത അടി: വിഡി സതീശന്‍

മുഖ്യമന്ത്രി പിണറായി വിജയന്‍ രാജിവെച്ച് അന്വേഷണം നേരിടണമെന്നാവശ്യപ്പെട്ട പ്രതിപക്ഷം ഉമ്മന്‍ചാണ്ടിക്കുണ്ടായ ദുരനുഭവം ഓര്‍മ്മിപ്പിക്കുന്നു. ഉമ്മന്‍ചാണ്ടിക്കെതിരെ കേസെടുത്തപ്പോള്‍ ഈ ന്യായം എവിടെയായിരുന്നുവെന്ന് വിഡി സതീശന്‍ ചോദിക്കുന്നു. ഞങ്ങള്‍ ചോദിക്കുന്നത് പണ്ട് സോളാര്‍ തട്ടിപ്പ് കേസിലെ പ്രതിയായിരുന്ന സരിതയുടെ മൊഴിയുടെ അടിസ്ഥാനത്തിലല്ലേ അന്ന് പാവം ഉമ്മന്‍ചാണ്ടിയുടെ പേരില്‍ കേസെടുത്തത്. സ്ത്രീപീഡനത്തിനെതിരെയാണ് കേസെടുത്തത്.

വളരെ മോശമായിട്ടാണ് അന്ന് ഉമ്മന്‍ചാണ്ടി ഈ ഇടതുപക്ഷം ചിത്രീകരിച്ചത്. അദ്ദേഹത്തിന്റെ പ്രായവും അദ്ദേഹം ഇരിക്കുന്ന സ്ഥാനവും ആളുകള്‍ അദ്ദേഹത്തിന് നല്‍കിയ അംഗീകാരവും കണക്കാക്കാതെയാണ് ഒരു മര്യാദയുമില്ലാതെയാണ് അന്ന് ഉമ്മന്‍ചാണ്ടിക്കെതിരെ കേസെടുത്തത്. ഇന്ന് ആ ന്യായം വേറെയാകുന്നത് എന്തിനാണെന്നും വിഡി സതീശന്‍ ചോദിക്കുന്നു. അന്ന് സരിത തട്ടിപ്പ് കേസിലെ പ്രതിയായിരുന്നെങ്കിലും സ്വപ്‌ന സുരേഷും ഇന്ന് തട്ടിപ്പ് കേസിലെ പ്രതിയാണെന്നും വിഡി സതീശന്‍ പറയുന്നു.

നിരപരാധിയായ ഉമ്മന്‍ചാണ്ടിക്കെതിരെ കേസെടുത്തവര്‍ക്ക് കാലം മുഖം അടച്ചുകൊടുത്ത അടിയാണ് സ്വര്‍ണക്കടത്ത് കേസ് പ്രതികളുടെ വെളിപ്പെടുത്തലെന്നും അദ്ദേഹം പറഞ്ഞു. എം. ശിവശങ്കറിന്റെ മൊഴി മുഖ്യമന്ത്രിക്ക് എതിരല്ലെന്നാണ് സിപിഎം നേതാക്കള്‍ പറയുന്നത്. എന്നാല്‍ കേസിലെ മറ്റൊരു പ്രതിയായ സ്വപ്നയുടെ മൊഴി വിശ്വസിക്കാനാകില്ലെന്നും പറയുന്നു. മറ്റൊരു തട്ടിപ്പു കേസിലെ പ്രതിയായ സ്ത്രീ നല്‍കിയ പരാതിയുടെ അടിസ്ഥാനത്തില്‍ മുന്‍ മുഖ്യമന്ത്രി ഉമ്മന്‍ ചാണ്ടിക്കെതിരെ കേസെടുത്തതും അപമാനിച്ചതും സിപിഎം മറക്കരുതെന്നും വിഡി സതീശന്‍ ഓര്‍മ്മിപ്പിക്കുന്നു.