അന്ന് ഞാന്‍ തുള്ളിച്ചാടി, ഇന്ന് വേദനയുണ്ടെന്ന് സഭയില്‍ ഗണേഷ്‌കുമാര്‍

രണ്ടാം പിണറായി സര്‍ക്കാര്‍ അധികാരത്തില്‍ വന്നത് വെറും കിറ്റിന്റെ പേരിലാണെന്ന് പറഞ്ഞ് പ്രചരിക്കുന്നത് ശരിയല്ലെന്ന് കെബി ഗണേഷ് കുമാര്‍ എംഎല്‍എ നിയമസഭയില്‍ വ്യക്തമാക്കി. റോഡിലെ കുഴികള്‍ എന്നും ഒരു ആയുധമാക്കി മാറ്റാറുണ്ട്. പാതാളത്തിലേക്കുള്ള ദൂരം കുറഞ്ഞു, ഘട്ടറിലോടി മാവേലിയുടെ നടുവോടിഞ്ഞു ഇത്തരം തമാശകളാണ് കേള്‍ക്കുന്നത്. മുഹമ്മദ് റിയാസ് എല്ലാം സുതാര്യതയോടെ നടത്തുമെന്ന് പറയുമ്പോള്‍ അദ്ദേഹത്തിനോട് തനിക്ക് പറയാനുള്ളത് ഇപ്പോഴും നാഷണല്‍ ഹൈവേകളില്‍ കുഴികള്‍ രൂപപ്പെട്ടു കിടക്കുകയാണെന്നാണ്. അതിനൊരു നടപടി റിയാസ് ഉണ്ടാക്കണമെന്നും ഗണേഷ് കുമാര്‍ പറയുന്നു.

മുന്‍ ധനകാര്യ മന്ത്രി തോമസ് ഐസക്ക് പ്രഖ്യാപിച്ച ആറ് റോഡുകളെക്കുറിച്ചും അതിനുപിന്നാലെ ഉണ്ടായ നടപടിയെക്കുറിച്ച് നിയമസഭയില്‍ കെബി ഗണേഷ് കുമാര്‍ എംഎല്‍എ സംസാരിക്കുകയുണ്ടായി. ജനങ്ങളെയെല്ലാം ഞാന്‍ വിളിച്ചു പറഞ്ഞു..നമുക്ക് റോഡ് കിട്ടി…ഞാന്‍ അന്ന് ഒരുപാട് ആഹ്ലാദിച്ചിരുന്നു. എന്നാല്‍ ഇന്ന് അതോര്‍ത്ത് ഞാന്‍ ദുഃഖിക്കുന്നുവെന്ന് ഗണേഷ് കുമാര്‍ പറയുന്നു. ഞാനിപ്പോള്‍ വളരെ വേദന അനുഭവിക്കുന്ന ആളുമായി മാറിയിരിക്കുകയാണ്. ഞാന്‍ ജനങ്ങളുടെ മുന്നില്‍ ഒരു ചോദ്യചിഹ്നമായി നില്‍ക്കുന്ന കാഴ്ചയാണ് ഇപ്പോഴുള്ളത്.

അതിവിദഗ്ധരുടെ ബാഹുല്യമാണ് ഈ റോഡുകള്‍ തടസ്സപ്പെടുന്നതിന് കാരണമായത്. കേരളത്തിന്റെ ചീഫ് എഞ്ചിനീയര്‍മാരെ പഠിപ്പിക്കുന്നത് ബിടെക് പാസായി കഴിഞ്ഞവരാണ്. കഴിഞ്ഞാഴ്ച ഒരു സ്വകാര്യ കോളേജില്‍ കാശ് കൊടുത്തിറങ്ങിയ പയ്യനാണ് കേരളത്തിന്റെ ചീഫ് എഞ്ചിനീയറെ പാഠം പഠിപ്പിക്കുന്നത് എന്ന അവസ്ഥയാണുള്ളത്. ഇത് ശരിയല്ലെന്ന് കെബി ഗണേഷ് കുമാര്‍ പറയുന്നു. അതില്‍ മന്ത്രി ഇടപെടണം, അതേക്കുറിച്ച് വിശദമായി പഠിക്കണമെന്നും ഗണേഷ് ആവശ്യപ്പെടുന്നു. അതിവിദഗ്ധന്മാരുടെ ബാഹുല്യം നമുക്ക് വളരെ ബുദ്ധിമുട്ടായി മാറിയിട്ടുണ്ടെന്നും ഗണേഷ് വിമര്‍ശിക്കുന്നു. ഞാന്‍ പറയുന്നത് തെറ്റാണെങ്കില്‍ ക്ഷമിക്കണമെന്നും തനിക്ക് സത്യം പറഞ്ഞേ പറ്റൂവെന്നും ഗണേഷ് കുമാര്‍ സഭയില്‍ തുറന്ന് പറയുന്നു. ഇത് പറഞ്ഞില്ലെങ്കില്‍ ജനങ്ങള്‍ക്കുമുന്നില്‍ നമ്മളെല്ലാവരും ഉത്തരം പറയേണ്ടിവരുമെന്നും ഗണേഷ് കുമാര്‍ പറയുന്നു. ഇവര്‍ എഴുതിവെക്കുന്ന മണ്ടത്തരങ്ങള്‍ മന്ത്രി വായിച്ച് പഠിക്കണമെന്നും ഗണേഷ് ആവശ്യപ്പെടുന്നു.