മുഖ്യമന്ത്രിയുടെ ദുരിതാശ്വാസ നിധിയിലേക്ക് സംഭാവന ചെയ്യരുതെന്ന മുന്നറിയിപ്പുമായി ശ്രീശാന്ത്

കൊവിഡ് രൂക്ഷമാകുന്ന സാഹചര്യത്തില്‍ ഓക്‌സിജന്‍ ക്ഷാമവും കൊവിഡ് വാക്‌സിന്‍ ക്ഷാമവും ഭീകരാന്തരീക്ഷം സൃഷ്ടിക്കുന്നുണ്ട്. ഇതിനിടയിലാണ് മുഖ്യമന്ത്രിയുടെ ദുരിതാശ്വാസ നിധിയിലേക്കും പിഎം ഫണ്ടിലേക്കും സംഭാവനകള്‍ ഒഴുകുന്നത്. എന്നാല്‍ ഇങ്ങനെ സംഭാവന ചെയ്യുന്നവരോട് മലയാളി ക്രിക്കറ്റ് താരം ശ്രീശാന്തിന് ചിലത് പറയാനുണ്ട്. ഒരു മുന്നറിയിപ്പുമായാണ് ശ്രീശാന്തിന്റെ കുറിപ്പ്. പല കായിക താരങ്ങളും സംഭാവനയുമായി മുന്നോട്ടു വന്നിരുന്നു. എന്നാല്‍, ഇങ്ങനെ ചെയ്യുന്നതിനുമുന്‍പ് നിങ്ങളെല്ലാംവരും ചുറ്റുമൊന്ന് കണ്ണോടിക്കണമെന്ന് ശ്രീശാന്ത് പറയുന്നു.

കടുത്ത സാമ്പത്തിക ബുദ്ധിമുട്ട് അനുഭവിക്കുന്നവരെ സഹായിക്കേണ്ടതിന്റെ ആവശ്യകതയെക്കുറിച്ചാണ് ശ്രീശാന്ത് പറയുന്നത്. മുഖ്യമന്ത്രിയുടെ ദുരിതാശ്വാസ നിധിയിലേക്ക് പണം വാരിയെറിയുന്നത് നിര്‍ത്തുക. നിങ്ങളുടെ ബന്ധുക്കള്‍ക്കോ സുഹൃത്തുക്കള്‍ക്കോ ജോലിക്കാര്‍ക്കോ കൊവിഡ് മഹാമാരിക്കിടയില്‍ ദുര്‍ബലരായി പോയവരുണ്ടാകാം. ആദ്യം അവരെ കരുത്തരാക്കുക.

പ്രധാനമന്ത്രിക്കോ മുഖ്യമന്ത്രിക്കോ അവരിലേക്ക് എത്താനാകില്ലെന്നും നിങ്ങള്‍ക്ക് മാത്രമേ അതിനു സാധിക്കുള്ളൂവെന്നും ശ്രീശാന്ത് പറയുന്നു. നിലവില്‍ ഇന്ത്യക്ക് സഹായവുമായി നിരവധിപേര്‍ രംഗത്തെത്തിയിരുന്നു. ഓസ്‌ട്രേലിയന്‍ താരം പാറ്റ് കമ്മിന്‍സ്, ശിഖര്‍ ധവാന്‍, ശ്രീവത്സ് ഗോസ്വാമി, ബ്രറ്റ് ലീ തുടങ്ങിയ താരങ്ങളെല്ലാം സംഭവാന നല്‍കിയിരുന്നു.

നിലവില്‍ കേരള ടീമില്‍ മാത്രമാണ് ശ്രീശാന്ത് കളിക്കുന്നത്. ഐപിഎല്‍ കളിക്കാനുള്ള ശ്രമം നടത്തിയെങ്കിലും താരലേല പട്ടികയില്‍ നിന്ന് ബിസിസിഐ ഒഴിവാക്കുകയായിരുന്നു.