റാഗിംഗ്, വിദ്യാര്‍ത്ഥിയെ സീനിയേഴ്‌സ് കൂട്ടം ചേര്‍ന്ന് തല്ലിച്ചതച്ചു

കോഴിക്കോട് . ഇന്‍സ്റ്റഗ്രാമില്‍ പങ്കുവച്ച ഫോട്ടോ ഡിലീറ്റ് ചെയ്യണമെന്ന് ആവശ്യപ്പെട്ടു വിദ്യാർത്ഥിക്ക് നേരെ സീനിയേഴ്‌സിന്റെ വക റാഗിങ്ങും മൃഗീയ പീഡനവും. കോഴിക്കോട് ചാത്തമംഗലം എംഇഎസ് ആര്‍ട്സ് ആന്‍ഡ് സയന്‍സ് കോളജിലെ ഒന്നാം വര്‍ഷ ഫാഷന്‍ ഡിസൈനിങ് വിദ്യാര്‍ത്ഥിക്കാണ് മര്‍ദനമേൽക്കേണ്ടി വന്നത്. മുഖത്തും കണ്ണിനും കൈകാലുകൾക്കും പരിക്കേറ്റ വിദ്യാര്‍ത്ഥിയെ കോഴിക്കോട് മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചിരിക്കുകയാണ്. ഇതിനിടെ മർദ്ദിക്കുമെന്ന് സീനിയർ വിദ്യാർത്ഥികൾ ഭീഷണിപ്പെടുത്തുന്ന ഓഡിയോ സന്ദേശവും പുറത്തുവന്നിട്ടുണ്ട്.

ഇൻസ്റ്റാഗ്രാമില്‍ കൂട്ടുകാര്‍ക്കൊപ്പം നില്‍ക്കുന്ന ഒരു ചിത്രം വിദ്യാർത്ഥി പങ്കുവച്ചതിനാണ് മർദ്ദനം ഏൽക്കേണ്ടി വന്നത്. രണ്ടാം വര്‍ഷ ഹിസ്റ്ററി വിദ്യാർത്ഥികളായ അജ്നാസ്, സഫീര്‍, നൗഷില്‍, അനസ് എന്നിവരടങ്ങുന്ന ഇരുപതോളം പേര്‍ ചേര്‍ന്നായിരുന്നു വിദ്യാർത്ഥിയെ തല്ലി ചതച്ചത്. റാഗിങ്ങിൽ അഞ്ചോളം വിദ്യാർത്ഥികൾക്കാണ് മര്‍ദനമേൽക്കേണ്ടി വന്നു. ഇവരിൽ ഒരു വിദ്യാർത്ഥിയുടെ പരിക്ക് ഗുരുതരമാണ്. കണ്ണിന് താഴെ ഗുരുതര പരിക്കേറ്റിട്ടുണ്ടെന്നും കാഴ്ചയ്ക്കടക്കം ബാധിക്കുന്ന തരത്തിലുള്ള പരിക്കാണ് സംഭവിച്ചതെന്ന റിപ്പോർറ്റുകളാണ് പുറത്ത് വന്നിരിക്കുന്നത്.

സീനിയർ വിദ്യാർത്ഥികള്‍ക്കെതിരെ ഗുരുതരമായി പരിക്കേറ്റ വിദ്യാർത്ഥിയുടെ കുടുംബം പ്രിന്‍സിപ്പലിനും കുന്ദമംഗലം പൊലീസിലും പരാതി നല്‍കിയിട്ടുണ്ട്. സീനിയർ വിദ്യാർത്ഥികള്‍ക്കെതിരെ ശക്തമായ നടപടി എടുക്കുമെന്നാണ് കോളജ് പ്രിന്‍സിപ്പല്‍ പറഞ്ഞിട്ടുള്ളത്. പ്രിന്‍സിപ്പലിന്‍റെ റിപ്പോര്‍ട്ട് കിട്ടിയാലുടന്‍ നടപടി സ്വീകരിക്കാനിരിക്കുകയാണ് പോലീസ്.