തലയ്ക്ക് 30ലക്ഷം രൂപ വിലയിട്ട നക്‌സല്‍ നേതാവ് ദിനേശ് ഗോപിനെ എന്‍ഐഎ അറസ്റ്റ് ചെയ്തു. തന്റേതായ ശൈലിയില്‍ നക്‌സല്‍ പ്രസ്ഥാനത്തിന് പുതിയൊരു മുഖം കൊടുത്ത് പീപ്പിള്‍സ് ലിബറേഷന്‍ ഫ്രണ്ട് ഓഫ് ഇന്ത്യ എന്ന പിഎല്‍എഫ്‌ഐയെ പടുത്തുയര്‍ത്തി കൊണ്ടു വരികയായിരുന്നു ഇയാള്‍. ഇയാള്‍ക്കെതിരെ വിവിധ സംസ്ഥാനങ്ങളിലായി നൂറിലേറെ കേസുകളാണ് ഉള്ളത്. ഗോപിനെ കുറിച്ച് വിവരം നൽകുന്നവർക്ക് ജാർഖണ്ഡ് പോലീസ് 25 ലക്ഷം രൂപ പാരിതോഷികം പ്രഖ്യാപിച്ചിരുന്നു. പിന്നീട്, ഗോപിനെക്കുറിച്ചുള്ള വിവരങ്ങൾ നൽകുന്നവർക്ക് എൻഐഎ അഞ്ച് ലക്ഷം രൂപ പാരിതോഷികവും പ്രഖ്യാപിച്ചിരുന്നു. രണ്ടു ദശാബ്ദങ്ങളിലായി ഇയാള്‍ ഒളിവിലായിരുന്നു.
2016-ൽ പി എൽ എഫ് ഐ പ്രവർത്തകരിൽ നിന്ന് 25.38 ലക്ഷം രൂപയുടെ അസാധുവാക്കപ്പെട്ട നോട്ടുകൾ പിടിച്ചെടുത്തതുമായി ബന്ധപ്പെട്ട കേസിൽ ഗോപിനെതിരെ എൻഐഎ കേസ് രജിസ്റ്റർ ചെയ്തിട്ടുണ്ട്. രണ്ട് പതിറ്റാണ്ടോളം ഒളിവിൽ കഴിഞ്ഞിരുന്ന അദ്ദേഹം ന്യൂഡൽഹിയിൽ വച്ചാണ് അറസ്റ്റിലായത്.
ജാർഖണ്ഡ്, ബിഹാർ, ഒഡീഷ എന്നിവിടങ്ങളിൽ പ്രതികൾക്കെതിരെ ക്രിമിനൽ കേസുകൾ രജിസ്റ്റർ ചെയ്തിട്ടുണ്ട്. കൊലപാതകങ്ങൾ, തട്ടിക്കൊണ്ടുപോകലുകൾ, ഭീഷണികൾ, കൊള്ളയടിക്കൽ, 2007-ൽ രൂപീകരിച്ച ഒരു തീവ്രവാദ മാവോയിസ്റ്റ് സംഘടനയായ പി എൽ എഫ് ഐക്ക് വേണ്ടി ഫണ്ട് സ്വരൂപിക്കൽ എന്നിവയുമായി ബന്ധപ്പെട്ടാണ് ഇവർക്കെതിരെ കേസുകൾ. കമ്മ്യൂണിസ്റ്റ് പാർട്ടി ഓഫ് ഇന്ത്യയുടെ (മാവോയിസ്റ്റ്) പിളർപ്പ് ഗ്രൂപ്പാണ് പി എൽ എഫ് ഐ.
2022 ഫെബ്രുവരി 3 ന്, ജാർഖണ്ഡിലെ വെസ്റ്റ് സിംഗ്ഭും ജില്ലയിലെ ഗുദ്രി പോലീസ് സ്റ്റേഷന്റെ കീഴിലുള്ള വനമേഖലയിൽ ഗോപെയുടെ നേതൃത്വത്തിലുള്ള പി എൽ എഫ് ഐ സ്ക്വാഡും സുരക്ഷാ ഉദ്യോഗസ്ഥരും തമ്മിൽ ഏറ്റുമുട്ടൽ നടന്നിരുന്നു. വിമതർ വനത്തിലേക്ക് നുഴഞ്ഞുകയറുന്നതിന് മുമ്പ് ഏറ്റുമുട്ടലിൽ നിരവധി റൗണ്ട് വെടിയുതിർത്തു. എങ്കിലും അതിവിദഗ്ധമായി ഗോപേ രക്ഷപ്പെട്ടു. അന്ന് മുതൽ താവളം മാറ്റി മാറ്റി അന്വേഷണ ഉദ്യോഗസ്ഥരെ മുട്ടുകുത്തിക്കുകയായിരുന്നു ഇയാൾ. ഒളിത്താവളങ്ങളിൽ ഇരുന്നുകൊണ്ട് ജാർഖണ്ഡിൽ പിഎൽഎഫ്ഐയുടെ ശക്തികേന്ദ്രം പുനഃസ്ഥാപിക്കുന്നതിനുള്ള ശ്രമങ്ങളും അദ്ദേഹം നടത്തിവരികയായിരുന്നു.
2016 നവംബർ 10 ന് റാഞ്ചിയിലെ ബെറോ പോലീസ് സ്റ്റേഷനിൽ ആദ്യം രജിസ്റ്റർ ചെയ്ത കേസ് 2018 ജനുവരി 19 ന് എൻ ഐ എ വീണ്ടും രജിസ്റ്റർ ചെയ്തു. 2017 ജനുവരി 9 ന് നാല് പേർക്കെതിരെ പോലീസ് ആദ്യ കുറ്റപത്രം സമർപ്പിച്ചു.
തുടർന്ന് ഗോപെ ഉൾപ്പെടെ 11 പ്രതികൾക്കെതിരെ എൻഐഎ ആദ്യ അനുബന്ധ കുറ്റപത്രം സമർപ്പിച്ചു. അഞ്ച് വ്യക്തികൾക്കും മൂന്ന് സ്വകാര്യ കമ്പനികൾക്കുമെതിരെ 2022 ജൂലൈയിൽ രണ്ടാമത്തെ അധിക കുറ്റപത്രം സമർപ്പിച്ചു. 14 ബാങ്ക് അക്കൗണ്ടുകളും രണ്ട് കാറുകളും പണവും ഒരു കോടിയിലധികം മൂല്യമുള്ള സ്ഥാവര സ്വത്തുക്കളും എൻഐഎ കണ്ടുകെട്ടിയിട്ടുണ്ട്.
മുമ്പ് ജാർഖണ്ഡ് ലിബറേഷൻ ടൈഗേഴ്‌സ് എന്നറിയപ്പെട്ടിരുന്ന പിഎൽഎഫ്‌ഐ ജാർഖണ്ഡിൽ തോക്ക് ഉപയോഗിച്ചുള്ള നിരവധി കൊലപാതകങ്ങൾ ഉൾപ്പെടെ നടത്തിയിട്ടുണ്ട്. തൊഴിൽ രഹിതരായ യുവാക്കൾക്ക് മോട്ടോർ സൈക്കിളുകളും മൊബൈൽ ഫോണുകളും എളുപ്പത്തിലുള്ള പണവും നൽകി അവരെ തങ്ങളുടെ വശത്താക്കിയതിനു ശേഷം പരിശീലനം നൽകുകയും തീവ്രവാദ സംഭവങ്ങൾ നടത്താൻ മാരകായുധങ്ങൾ സജ്ജരാക്കുകയും ചെയ്തിരുന്നു.
കൽക്കരി വ്യാപാരികൾ, റെയിൽവേ കോൺട്രാക്ടർമാർ, ജാർഖണ്ഡിലെ വിവിധ ജില്ലകളിലെ വികസന പദ്ധതികളിൽ ഏർപ്പെട്ടിരിക്കുന്ന വിവിധ സ്വകാര്യ സ്ഥാപനങ്ങൾ എന്നിവരെ ഭീഷണിപ്പെടുത്തിയാണ് പിഎൽഎഫ്ഐയുടെ വരുമാനം കണ്ടെത്തിയിരുന്നത്. തട്ടിയെടുക്കുന്ന പണം ഷെൽ കമ്പനികൾ രൂപീകരിച്ചു വെളുപ്പിക്കുകയായിരുന്നു ചെയ്തിരുന്നത്. എകെ 47 ഉൾപ്പെടെയുള്ള ആയുധങ്ങളും വിദേശ നിർമ്മിത മറ്റ് റൈഫിളുകളും വാങ്ങാനും ഈ ഫണ്ട് ഉപയോഗിച്ചു.
തട്ടിയെടുക്കുന്ന ഫണ്ടുകൾ പാലക് എന്റർപ്രൈസസ്, ശിവ് ആദി ശക്തി, ശിവശക്തി സമൃദ്ധി ഇൻഫ്രാ പ്രൈവറ്റ് ലിമിറ്റഡ് തുടങ്ങിയ ഷെൽ കമ്പനികളിലാണ് നിക്ഷേപിച്ചതെന്നു ആരോപണമുണ്ട്. ഇതിൽ രണ്ടു കമ്പനികൾ പി എൽ എഫ് ഐ അസോസിയേറ്റുകളുമായും അദ്ദേഹത്തിന്റെ കുടുംബാംഗങ്ങളുമായും പങ്കാളിത്തത്തോടെയുമാണ് രൂപീകരിച്ചതെന്നാണ് വിവരം. തട്ടിയെടുത്ത പണം ഝാർഖണ്ഡിൽ നിന്ന് ഹവാല ഇടപാടുകാരുടെ ശൃംഖല വഴി മറ്റ് സ്ഥലങ്ങളിലേക്ക് മാറ്റുകയും ചെയ്തു.
2007 ജൂലൈയിൽ, സി.പി.ഐ-മാവോയിസ്റ്റിന്റെ വിമതനായ മസി ചരൺ പൂർത്തിയും അദ്ദേഹത്തിന്റെ നിരവധി അനുയായികളും പി.എൽ.എഫ്.ഐയെ നക്‌സൽ സംഘടനയായി വളർത്തുന്നതിനായി ഗോപെയോടൊപ്പം ചേർന്നിരുന്നു. പൂർത്തിയെ പിന്നീട് അറസ്റ്റ് ചെയ്‌തെങ്കിലും, ഗോപെയുടെ നേതൃത്വത്തിൽ പിഎൽഎഫ്‌ഐ അതിന്റെ പ്രവർത്തനങ്ങൾ വ്യാപിപ്പിക്കുകയായിരുന്നു.
